Reflexer
Kontaktperson: Erika Brändle, Blattenstrasse 11, 8717 Benken, 055 283 38 05
D’Reflexer sind im Jahr 2012 entstande. Nach guet 11 Jahr im 11er-Rat isch es amigs ade Zit, junge Lüt Platz z’mache, damit wieder frische Wind inä chunnt ... Da mer nachere so lange Zit uf vill schöni Momänt zruggbliggä und mit Glasseheit reflektierä und sinniere cha, mir aber au witerhin mit de ehemalige 11er-Gspänli händ wellä zäme sii, hämer d’EXELFER-Kliggä, also hinderschi gläsä d’REFLEXE’(R) gründet. Alli, wo emal im 11er-Rat gsi sind, sind nachem Ustritt automatisch Reflexer.
Währet de Zit im 11er-Rat händ d’Farbe Rot und Gäl mit Gilet und Chäppli z’Tenü bestimmt. Jetz isch natürli sofort d’Frag ufchoh: was, und vorallem weli Farbä leggät mir jez a? D’Wahl isch nu schnell emal uf Schwarz und Wiiss gfalle. Wieso? Schwarz und Wiiss git Grau. Mittlerwilä sind einigi vo üs schu rächt grau worde. Und mir gsehnd nüd alles nur schwarz und wiiss, – nei, mir möchtet reflektiere ... Schwarz, will mir au ächli truurig sind, wills verbi isch. Wiiss für alles Nüi wo wieder chunnt ... Oder will mir alli wiiss ad Chesslätä gönd?
Üses Herz schlaht nach wiä vor für d’Bänggner Fasnacht. Drum bringet mir üs immer nu gern für s’Eint und s’Anderi ii. Mir organisieret z. B. d’Suppälöfflätä am Fasnachtszischtig, mir sind am Schmudo früeh am Morgä ade Chesslätä mit debi und de Kostümball am Abig lönd mir üs natürli au nüd entguh!
