FASNACHT
BÄNGGÄ

Die aktuell Fasnachtsplakettä stellt – eimal meh – s’aktuelle Fasnachtsmotto sehr schön 
dar. Es sind zwei Gsichter – es grimmigs und es fröhlichs. Wie im Läbe, lauft a dä Fasnacht au nüd immer alles wie am Schnüerli. Obwohl mir vu Bänggä für vieles «grüschtet» 
sind, gits immer wieder Useforderige, wie zum Bispiel z’Beizesterbe. Seggs wies well –
irgendwie gahts immer wiiter. So au das Jahr. Dangg vielne nüüe Ideä vu Kliggä und engagierte Fasnächtlerinne und Fasnächtler hät d’Fasnacht Bänggä au im Jahr 2026 einiges 
z’büte:

Wie immer und glich chli andersch – seggs wies well
Mit em Ischälle am Drükönigstag (6.1.26) gats luutstark los und schu am Samstig druf 
(10.1.26) findet i dä Rietsporthallä d’Kärrhöna-Party statt. Öb ihr ade Kärrhöna goes Atlantis mit dä Sumpfhüener iih- oder abtauchet: seggs wies well. Hauptsach ihr tauched 
spötistens am SchmuDo-Morgä (12.2.26) wieder uf! Dänn wird glich wie all Jahr chesslät 
und dä Türggä-Buzzi ufzogä. Nüü isch hingäge d´Bewirtig vum Gmeindssaal, wo üch dä 
Jodlerklub erwartet und dä Piccoloball, wo dur es nüüs Komitee organisiert wird und 
mitme frische Konzept dehär chunt. 

Bänggä im Tanzfieber
Am 53. Kostümball (SchmuDo, 12.2.26) verwandlet sich d’Rietsporthallä inä bunti Disco. 
S'Motto heisst "Thörsday Night Fever" und verspricht en tänzige Abig. Rollend, marschierend oder tanzend – seggs wies well – werdet über 44 Gruppe «Der Umzug» am FaSa26 
(Fasnachtssamstig, 14.2.26) eimal meh zumene Erläbnis für Lüüt vu nah und fern mache. 
Was im Aschluss an Umzug und bis zude Uslumpetä (17.2.26) suscht nu alles lauft, gfindet ihr im nachfolgende Kaländer.

Plakettämale
Die afangs erwähnt Plakettä, gnauer gseit 2200 Stugg dävo, werdet vo Private, de 
Schuelchind und ade öffentliche Malöbig im Pfarreiheim bunt igfärbt. Bisch du schu routiniert im Plakettämale oder startisch das Jahr dini erste Gehversüech dri? Seggs wies 
well, d Türe im Pfarreiheim sind für alli offe. Am Fritig, 9.1.26, gits sogar en spezielle Malabig wo Plakettämal-Profis dir ihri Tipps und Tricks verratet. Chum doch au mal verbi!
Dä 11er-Rat bedankt sich jetzt schu bi allne Hälferinne und Hälfer, Kliggä und Verein fürs 
mitwürke adä Fasnacht Bänggä 2026 und wünscht allnä ä fröhlichi 5. Jahresziit und d 
Glasseheit d’Sache so z neh, wies chömet. «Seggs wies well» halt…

​

De Fasnachtskaländer 2026                   Amäldig Schmudo

​