Usäbüzzlä, das gilt au nach dä wunderschönä Fasnachtstäg nu. Diä letschtä Konfetti werdät wegputzt und d Fasnachtsutensiliä für eis Jahr griffbereit wieder im Chaschtä verschtaut.

Schön isch si gsi, üseri «Jubiläums»-Fasnacht mit äm 40. Motto, dä passändä 40. Plakettä und äm 40. Kostümball. Dä Beni und dä Heinz händ dur än unterhaltsamä Kostümball gfüährt, wo bekannti wiä au ehemaligi Darbütigä im fourtyssimo-Studio für beschti Unterhaltig gsorgät händ.
D Heb am Geri Kühne isch für sin undändlich grossä Iisatz für üseri Fasnacht zum Ehrä-Tschämpien ernännt wordä. Und was üs 11er natürlich ganz speziell freut, s Sumpfhuen und üsi Ratskollegin d Irène Zweifel Hug isch am 40. Kostümball dä nüü Tschämpien wordä.

Mit vill wiissäm Konfettirägä (in Form vo Schnee) hät üs dä Petrus währet dä vergangenä Fasnacht beschänkt. Vill Fasnächtler sind unterwägs gsi, au wänns vu dä Chessletä am SchmuDo bis zu dä Türggä-Buzzi-Verbrännätä immer wieder wagger gschniit hät. 40 Nummerä sind am Umzug mit abwächsligsriichä und schönä Sujets durs Dorf zogä und au dä Türggä-Buzzi hät trotz Schneehübli wunderbar brännt und so vor dä Uslumpätä für än würdigä Abschluss gsorgät.

Dä 11er-Rat danggt allnä, wo däzuä biitreit händ, dass mer wieder unvergässlich schöni Momänt händ chönä erläbä. Zahlrichi Hälfer sowie diä villä agfrässnä Fasnächtler machäts möglich, dass mer au nach derä «Jubiläums»-Fasnacht mit Freud i Zuekunft luegät und üs scho wieder uf di kommend Fasnacht im 2014 freuät. Bis dänn wünschät mir üch ä schöni Ziit. Machets guet!