Mit em Iischällä vom 6. Januar 2014 sind mer i diä nüü Fasnachtssaison gstartet und bis zu dä Uslumpätä am 4. März 2014 häts ghäxt solangs häxt.

Im Januar händ flissigi Hälfer und Schüeler öppä 2014 Plakettä gmalät, wo bis am Fasnachtssamstig fascht gänzlich über dä Ladetisch gangä sind! Passend zu dä früeligshaftä Temperaturä händ d’Hagazussas mit em Farb und Pub «tropical» ihres 15-Jahr-Jubiläum gfiiret und chli spöter isch äs a dä «Kärrhöna goes Carnaval do Brasil» vo dä Sumpfhüener ebäfalls heiss zuä und her gangä.

Wie im Jahr 2009, wo d’Bänggner Fasnacht uf Feldkirch (A) verreiset isch, händ Chessler, Hagazussas, Sumpfhüener, Gliisser, 11er, Wäg(g)-Macher, diä urchigä Bänggner, Valentinos, Wäfüüri und ä huufä anderi Bänggner Fasnächtler mitenand am Jubiläumsumzug in Lachen SZ teilgno und üsi Fasnacht im bestä Sunnäliecht presentiert.

Am 41. Kostümball händ d‘Oberhäxemeister Heinz und Benno gekonnt dä roti Fadä dur diä verschiedäne iiheimische und uswärtige Darbüttäne gspunnä und dä als ehemaligä Türggä-Buzzi und Mittelfäldpuncher vom Sportclub Bänggä bekannti Vigi Romer isch id Tschämpiens-Liig ernännt wordä.

Mit dä «Walter» (ehemaligi Türggä-Buzzi) und dä «Schnitte» (Schnitzelbangggruppä) händ grad zwei nüüi Kliggä d’Bänggner Fasnacht zuesätzlich beriicheret.

Dä 11er-Rat danggt allnä Fasnächtler fürs mithäxne a dä Fasnacht 2014!
S’häxt solangs häxt – au nächscht Jahr wieder. Versprochä.